ad

एनआरएन तेस्रो विश्व नेपाली स्वास्थ्य सम्मेलन शुक्रबारदेखि

बुधबार, भाद्र ३० २०७८
image

लण्डन : गैरआवासीय नेपाली संघ (एनआरएनए) ले तेस्रो विश्व नेपाली स्वास्थ्य सम्मेलन आयोजना गर्ने भएको छ ।

लण्डनमा आयोजना हुन लागेको उक्त सम्मेलन सेप्टेम्बर १७ शुक्रबारदेखि १९ सम्म हुने एनआरएनएले जानकारी दिएको छ । 

उक्त सम्मेलनमा २५ देशका ३ सय भन्दा बढी नेपाली चिकित्सकहरु सहभागी हुने गैरआवासीय नेपाली संघ, स्वास्थ्य समितिका संयोजक डा. सन्जिव सापकोटाले बताए ।

स्वास्थ्य क्षेत्रमा अनुसन्धान, स्वास्थ्य प्रवर्द्धन, प्रयोगशाला, नेपालमा रोक नियन्त्रण केन्द्र, नेटवर्किङलगायत स्वास्थ्यसम्बन्धी उपचार रोकथाम र व्यवस्थापनका विषयमा सम्मेलन केन्द्रित रहने सापकोटाले जानकारी दिए ।

नेपालका प्रथम राष्ट्रपति डा. रामबरण यादवको आतिथ्यमा हुने सम्मेलनलाई एनआरएनए अध्यक्ष कुमार पन्त, डा. भगमान कोइराला, बेलायती उपल्लो सदनकी सदस्य लर्डस् ब्यानेरस क्यानेडी, डा. सुनिल शाह, गैरआवासीय नेपाली संघका महासचिव डा. हेमराज शर्मा, एनआरएनए स्वास्थ्य अनुसन्धान समितिका संयोजक डा बोधराज सुवेदीलगायतले सम्बोधन गर्ने कार्यक्रम रहेको सापकोटले बताए ।

सम्मेलनमा ५० भन्दा बढी नेपाली चिकित्सहरुले आआफ्नो कार्यपत्र प्रस्तुत गर्ने छन् ।

सापकोटाका अनुसार सम्मेलनमा विदेशमा रहेका नेपालीहरुको स्वास्थ्य अवस्था, कोभिड १९ महामारीको प्रभाव र चुनौती, नेपालमा खोपको सम्भावना, मुटुरोग, बालबालिका तथा महिलाहरुको स्वास्थ्य अवस्थालगायत विषयमा विज्ञ चिकित्सकहरुले कार्यपत्र पेश गर्ने छन् । 

सम्मेलनमा नेपाल मेडिकल काउन्सिल, अष्ट्रेलिया नेपाली मेडिकल काउन्सिल, नेपाल नर्सिङ एसोसियन यूके, नेपाली डाक्टर एसोसियसन यूके, गैरआवासीय नेपाली संघ यूके, नरसिङ्ग नेपाली एसोसिएसन यूकेलगायत एक दर्जन संघसस्था तथा प्रतिनिधिहरुको सहभागिता रहने छ ।

तीन दिनसम्म चल्ले सम्मेलनको पहिलो दिन चिकित्सकहरुले भर्चुअल माध्यमबाट आआफ्ना अनुसन्धान पत्र प्रस्तुत गर्ने छन् भने दोस्रो दिन सम्मेलनको औपचारिक उद्घाटन हुने छ । लण्डनस्थित नेपाली दूतावास भवनबाट उद्घाटन हुने सम्मेलनको समापन अल्डरसटमा गर्ने स्वास्थ्य समितिले जनाएको छ ।

सेप्टेम्बर १९ मा लण्डन घोषणापत्र जारी गर्दै सम्मेलन समापन गरिने सापकोटाले बताए ।

यसअघि गैरआवासीय नेपाली संघले अमेरिकामा पहिलो र दोस्रो स्वास्थ्य सम्मेलन आयोजना गरिसकेको छ ।

ad
ad
ad