ad

"ब्राण्डेड बलात्कार"

हेमन्त गिरी
शनिबार, फागुन १ २०७७
image

अकारण 
जवान छात्राको 
पीठ थपथप्याइरहेका 
ज्ञानी हातहरुले 
गरिरहेका हुन्छन बलात्कार !!

सकारण 
बजार बाट फर्किंदा 
घर नपुगी छिमेकमा पस्ने 
चम्किला चकलेटहरुले 
गरिरहेका हुन्छन बलात्कार !!

महानतम आदर्श
सुललित सिद्धान्त 
र 
अग्ला चिप्ला उद्घोषहरुको 
विकारमा चिप्लिएर 
‘जूनियर स्टाफ’ का 
वक्ष-नहरमा गोता लगाइरहने 
विद्वान आँखाहरुले 
गरिरहेका हुन्छन बलात्कार !!

केशलाई बादल-ओंठलाई बदाम,
आँखालाई मृगनयन-जवानीलाई गंगा,
अनेकन शकुनी-शब्द, विम्ब र प्रतीकहरु ! 
शरीरका विज्ञापन लेख्ने 
‘कर्पोरेट’ कलमहरुले 
गरिरहेका हुन्छन बलात्कार !!

आवरणमा मखमलको वस्त्र ओढाएर 
पृष्ठहरुमा नङग्याउने 
‘ब्रान्डेड’ पुस्तकहरुले 
गरिरहेका हुन्छन बलात्कार !
हवसले क्यानभास रङग्याउने 
दोअर्थी ‘स्केच’हरुले 
गरिरहेका हुन्छन बलात्कार !

आड देखाए जस्तो गरी 
आख्यानहरुले गरिरहेका हुन्छन बलात्कार !
कष्ट लेखिदिए जस्तो गरी
कथाहरुले गरिरहेका हुन्छन बलात्कार !
आवाज उठाइदिए जस्तो गरी
कविताहरुले गरिरहेका हुन्छन बलात्कार !

केही कप कफीका प्रस्तावहरुले 
गरिरहेका हुन्छन बलात्कार !
केही आकर्षक प्रोजेक्टका प्रलोभनहरुले 
गरिरहेका हुन्छन बलात्कार !
‘मेसेज’का दुई थरी अर्थले 
गरिरहेका हुन्छन बलात्कार !
प्रशंसाका चार थान शब्दले 
गरिरहेका हुन्छन बलात्कार !

हामी ठान्छौं,
बलियो शरीरले 
कमजोर वदनलाई गर्छ बलात्कार !
बलिया हातहरुले 
कमजोर कम्मरहरुलाई गर्छन बलात्कार !
बलिया अंगहरुले 
कमजोर आत्माहरुलाई गर्छन बलात्कार !
छाडा र अनियन्त्रित लिङगले 
बिचरा र बेसहारा योनीलाई गर्छ बलात्कार !!

होइन !

चिल्लो गत्तामा लपेटिएको 
सभ्य र आधुनिक भनाउँदो 
समाज नामको किताब भित्र 
दिनहूँ गरिरहन्छन बलात्कार-
देब्रे पानाका अक्षरहरुले
दाहिने पानाका चित्रहरुलाई !

न यो किताबलाई
पूरै पढ्ने हिम्मत गर्यो कसैले !
न यो किताबका 
पाना च्यात्ने साहस जुटायो कसैले आजसम्म !

घरका ऐना लुकाई 
बजारमा ऐन मागिरहेछौं हामी !
युगौं देखि ‘ब्रान्डेड बलात्कार’लाई 
यसै गरी ‘सर्टिफाई’ गरिरहेछौं हामी !!

✍️हेमन्त गिरी, जापान

ad
ad ad