ad

बनिनसक्दै 'सोल्ड आउट' भयो चार्ज नै गर्नु नपर्ने सोलार कार

जिएन संवाददाता
शनिबार, मङ्सिर २७ २०७७
image

यदि तपाईं पेट्रोलियम कारबाट प्रदूषणरहित इलेक्ट्रिक कारतिर जान चाहनुहुन्छ तर चार्ज गरिरहनुपर्ने समस्याले रोकिनुभएको छ भने तपाईंका लागि खुशीको खबर छ । 

तेल हाल्ने या चार्ज गर्ने झन्झटबिनै सौर्य ऊर्जाबाट चल्ने अप्टेरा-3 कार बजारमा आउने भएको छ । 'नेभर चार्ज' भन्ने नाराका साथ अमेरिकाको एउटा स्टार्ट-अप कम्पनी अप्टेरा मोटर्सले विकास गरेको तीन पाङ्ग्रे कार आफै चार्ज हुनेछ र चाहिएको बेला तयार हुनेछ । आगामी वर्ष डेलिभरी दिने गरी खोलिएको यो कारको पहिलो लटको बुकिंग २४ घण्टाभित्रै सकिएको थियो । दुई सिट रहने यो कारको मूल्य कम्तिमा २६ हजार अमेरिकी डलर तोकिएको छ । 

नारामा भनिएजस्तो यो सधैँ बिना चार्ज नै चल्ने भने होइन ।  तपाईंले यो सोलार कारलाई खुला र घाम लाग्ने ठाउँमा पार्क  गर्नुपर्नेछ र बाहिरी भागमा रहेको सोलार प्यानलले यसमा रहेको ब्याट्री चार्ज हुनेछ । एक पटकको चार्जले चालीस माइल अर्थात् ६४ किलोमिटरसम्म यात्रा गर्न सकिने कम्पनीको दाबी छ । कम्पनीका अनुसार एक वर्षमा १८ हजार किलोमिटरसम्मको यात्रा तेल या बिजुली बिना गर्न सकिने हुनाले यो अन्य कारभन्दा सस्तो र वातावरणमैत्री हुनेछ । आवश्यक पर्दा बिजुलीबाट समेत यसलाई चार्ज गर्न सकिन्छ । 

यो कार सफल भयो भने स्वच्छ ऊर्जातर्फको विश्वव्यापी यात्रामा ठूलो मद्दत पुग्ने विश्लेषकहरूको राय छ ।

ad
ad ad